السلام عليكم ورحمة الله
بسم الله والحمد لله والصلاة والسلام على حبيبى رسول الله



انهرده جيبالكم تجربتى مع ذوجى الى اتجوزته عن حب وعملت المستحيل عشان يجمعنا بيت واحد

وقلت افيدكم بخلاصة خبرتى فى التعامل مع الزوج او بمعنى اصح الراجل لان الرجاله كلهم نسخه واحده

معنى كلمة راجل

1 - تحكمات
2- عصبيه على اقل سبب
3- سيطره كامله على اى موقف يخصك من قريب او بعيد
4- استحواذ على كل السلطات حتى الى تخص الطبيخ

انا باغلي
يعنى من الاخر هوا تركيبه عجيبه لايعلم رضاها او اسعادها الا الله


طبعا اتعقدتوا دلوئتى وخارجين تجروا

استنى يااختي انتى وهيا .....تفتكروا انى داخله اعكنن عليكم ولا ازود همكم


لاء طبعا انا حبيت بس اعرفكم ان كل واحده بتبئا فاكره ان جوزها الوحيد الى فيه العيوب دى

وساعات بلاقى ناس تعد تقارن وتقول اصلى مش متجوزه عن حب وواحده تقول اصلى استعجلت ومعملتش فتره خطوبه كافيه

وواحده تقول اصلى قدمت وراحت عليا تعددت الاسباب والراجل واحد


بعد تفحيص وتمحيص وخناقات ولوى بوز وشد فشعرى وشعر اصحابى توصلت لحل جاب معايه نتيجه فظيعه بجد بجد


تعالى اقولك الاول على موقف مثلا

لاحظت ان جوزى بيحب يعمل راجل اوى قدام اهله ويعاملنى على انى الشغاله بتاعته

تعالى روحى هاتيلى فين الى قلتلك عليه كدا يعنى ويحب يلغى شخصيتى ويقاطع كلامى لو قلت راى فى اى شئ

لاحظت انى لو فى البيت بتخانق على اقل سبب معاه وهوا كمان ويلوى بوزو وياما يسبنى وينام يأما ينزل يعد مع صوحابه

واعد انا احرق فى اعصابى ياترى بيعاكسوا بنات ياترى بيلعبوا فى راسوا يتجوز تانى لان بعضهم متجوز مرتين

والكلام دا كله

المهم ان دا كان بيحصل بعد كل خناقه لو على اتفه سبب وطبعا لازم كنت اروح اعتذر واقدم فروض الطاعه والولاء

واندم واتندم انى زعلته وأبوس ايديه ورجليه لحد ما يصالحنى عشان الحياه متبقاش نكد وعكننه

طبعا كلنا مختلفين فى الخناقات وفى طريقة الصلح


الى عرفت انه بيجيب نتيجه بجد تعالى اقولك هيا خطوت لازم تمشى عليها كلها لان كلها بتكمل بعضها

وهيا سهله وبسيطه

أولا اما يزعلك او يضايقك او ينرفزك مترديش عليه ولا تزعقى قصاده ولا شتايم ولا الكلمه بكلمتها ولا كأنك موجوده

عارفه ليه يا شاطره لانك كدا بتضيعى حقك وفى الاخر انتى الى قلبك الحساسيه هتاكله وتروحى تعتذرى

لاء بلاش تضيعى حقك بغلطك او بطلوة لسانه او حتى بنظره أنسحبى من سكات ولو كنتى فى الشارع برضو امشى ساكته

لحد ما تروحى البيت

فى البيت هتعملى الخطوه التانيه بدل ما هتعدى ترزعى فى الحاجه من ايدك وتحرقى الاكل وتضربى العيال وكل الحاجات دى

لاء هتدخلى يا سيدات سيدتى تعملى ريفرش لنفسك زى ما تحبى تاخدى شاور بئا او تغسلى وشك وايديكى ورجليكى وتصبنى الاماكن الى بتعرق اكيد فهمانى

ودا ليه اثر كبير جدا اولا هتخفضى من نسبة نرفزتك وغضبك بنسبة 90% اه والله

تعالى أولك ازاى بئا تضيعى ال 10 % التانين وكمان تخلى حالتك المزاجيه 200 %

وتخليه يجى يصالحك كمان

اولا لازم تكونى عامله كل واجباتك يعنى لو على غدا او عشاء أنجزيهم وخليهم على الغرف عشان متديلوش فرصه

يطلب ويتامر تانى ويزود غضبك

وبعدين ادخلى اوضة نومك الحلوه نقى ترنج او جلابيه او حاجه بنوتاتى حلوه أبعدى عن قمصان النوم وهقولك ليه قدام

والبسيها وروحى أعملى ميكب وظبطى شعرك وحطى برفيوم حلو يكون بيحبه وبس هتلاقى نفسك الغضب راح

وحالتك المزاجيه اتحسنت كتييييييير لانك اخدتى ثقه بنفسك تانى بدل الى هوا أفقدهالك

وأخرجى بمنتهى الهدوء لو على وقت غدا مثلا ها هتتغدى يا ---- بأسمه بدون دلع او غزل بس بطريقه عاديه

مش بلاوية بوذ متضيعيش أنوثتك

وعارفه ليه قولتلك متلبسيش قميص نوم عشان ممكن يفتكر انك بتغريه عشان ليكى غرض كدا ولا كدا ممكن يعند ويتقل اكتر

لاء انتى عوزاه هوا الى يجيلك ويصالحك ويتوسل اليكى

طبعا هوا ههيتفاجئ بكل حاجه أولا بانك غيرتى أسلوبك ومزعقتيش قصاده ولا غلطتى فيه

ثانيه بأنك الموضوع كله مش همك اصلا وانه معرفش يفقدك ثقتك بنفسك ويعد هوا مع اصحابه على الموبايل

يضحك ويهزر أو مع الكمبيوتر او ينزل يقعد معاهم اونتى الى قاعده محروقه

ثالثا بصمتك اووووووووووووووووووووووه بجد الصمت دا سلاح رهيب

الرجاله ديما تنجذب للست الصامته الهاديه ليه لان الراجل بطبعه بيحب الاكتشاف

فلما هتعدى ساكته وانتى عاديه مش ضاربه بوذ هيمووووووووووت ويعرف بتفكرى فى أيه وليه عامله فى نفسك كدا

وألا بئا يابت يافتوكه لو عملتى شوية أغرائات غير مباشره

يعنى مثلا حطيتى رجل على رجل ولو بتتفرجى على فيلم بيضحك تضحكى ضحكه مغريه كلها انوثه بس بصوت واطى

عشان مينكدش عليكى عيشتك لو عندك اطفال امسكى اصغرهم واعدى لاعبيه وبوسيه ودلعيه شويه برقه ودلع

تقومى تعمليلك شوية عصير نسكافيه قهوه شاى اى حاجه واشربيها برقه كدا

مع حفاظك على ان الكلام على قد السؤال بس مش بتكشيره او بلوية بوذ لانه هيدور على اى حاجه

يغلطك بيها وياخد الموقف لصالحه زى كل مره

لاء لكن على ميييييييييييييييييييين منا حفظت خلاص كل مره انا الى بعد محروقه استفدت ايه من الزعيق والخبط والرزع وضرب العيال

والله العظيم ان كل اصحابى الى متجوزين جواز صالونات والى متجوزين رجاله اكبر منهم او العكس وأنا الى متجوزه عن حب

الطريقه دى نفعت معانا


وأتأكدى ان سر جمال المرأه فى ذكأها مش فى جمالها بس
حتى بتلاقى ان ممكن واحد يبئا متجوز واحده جميله أوى

ويروح يتجوز واحده تانيه عليها مش شرط تكون أحلى منها بس عشان شغلت دمغها وعرفت توقعه

وهيا احسن منى ومنك فى أيه وتأكدى ان ربنا هيبئا معاكى ويلهمك كل شئ لو حتى مبتعرفيش تدلعى او تتمكيجى

لانك بتحافظى على بيتك وزوجك وبتسعى لاسعادك وأسعاده

والله لو عملتى الطريقه دى هتلاقيه مهما فضل على عنده ساعتين تلاته يوم اتنين فى الاخر هوا الى جى يصالحك

وهيفضل وراكى لحد ما يرجعك للاول ويخليكى تغلطى تانى لانه حابب احساس انك انتى الى دايما ملهوفه عليه وعوزه ترضيه

مش حابب انه هوا الى يبئا كدا ذكاءك هوا الى هيخليكى ديما حاسه بسعاده ومره على مره هتلاقيه فكر ألف مره قبل ما يزعلك او يتخانق على اتفه سبب لانه عارف ان الضريبه غاليه

غموضك هوا الى هيجننه جمالك رقتك هما الى هيخلوه يلف حوالين نفسه وعقله ديما يبئا مشغول بيكى

وعلى فكره برضوا قعدت افكر فى موضوع انه بيحب يعاملنى ذى الشغاله بتاعته قدام اهله

واتوصلت للحل دا

أنى انا اديله برستيجه واسأله قبل ما يقلى اعملى واقوله حاضر ديما حتى لو مش موافقه او مقتنعه وقدام اصحابوا واى حد احس انه عاوز يبين رجولتوه قدامه



وفى النهايه ربنا يسعدنى ويسعدكم كلكم